Xitoyning eng yirik kruiz layneri ilk sinov reysini yakunladi

Layner 9 noyabr kuni Shanxaydagi Uzungkou xalqaro kruiz terminalidan joʻnab, toʻrt kundan keyin Guanchjoudagi Nansha portiga yetib keldi. Safar davomida ekipaj kema boshqaruvi xavfsizligini, qirgʻoqdagi xizmatlar bilan aloqani va axborot tizimlari ishini, shuningdek, yoʻlovchilarga xizmat koʻrsatish — kabinalarga joylashtirish, ovqatlanish va koʻngilochar dasturlarni tekshirdi.

China Tourism Group bosh direktorining oʻrinbosari Tszyan Iyning aytishicha, reys kema ishga tayyorligini har tomonlama baholash imkonini berdi. U suzish xavfsizligi, yoʻlovchilarga xizmat koʻrsatish va qirgʻoq xizmatlari bilan hamkorlikni qoniqarli deb baholadi.

Bortda Sharqiy Xitoydagi 16 ta universitetdan deyarli ming nafar oʻqituvchi va talaba, jumladan, Fudan, Chjetszyan va Nankin universitetlari vakillari boʻldi. Safar davomida kruiz sanoatini rivojlantirishga bagʻishlangan seminar ham oʻtkazildi. Unda biznes, davlat tashkilotlari va ilm-fan sohalaridan qariyb 80 nafar vakil qatnashdi.

14–16 noyabr kunlari layner Guanchjoudan Gonkongga ikkinchi sinov reysini amalga oshiradi. Unda yoʻnalishni tashkil etish va chegara nazorati tekshiriladi. Birinchi tijoriy kruiz 22 noyabrga belgilangan, operator Adora Cruises esa 2027 yil 2 yanvargacha oltita xalqaro reysni amalga oshirishni rejalashtirmoqda.

Kema 6 noyabr kuni China State Shipbuilding Corporation (CSSC) davlat korporatsiyasi tarkibiga kiruvchi Shanghai Waigaoqiao Shipbuilding kemasozlik zavodida operatorga topshirildi. Laynerning uzunligi 341 metrni tashkil etadi. Unda 5232 yoʻlovchiga moʻljallangan 2130 ta kabina va lyuks, shuningdek, 28 ta restoran va bar bor. Adora Flora City Xitoyda qurilgan ilk yirik kruiz layneri boʻlgan bir turdagi Adora Magic City kemasidan kattaroq.